អភិបាលរាជធានីភ្នំពេញលោក ឃួង ស្រេង បានបញ្ជាក់ថាអាជ្ញាធារទូទាំងរាជធានីបានត្រៀមខ្លួនរួចស្រេច ក្នុងការចាត់វិធានការបង្ក្រាបឲ្យអស់នូវគ្រឿងញៀនតាមកន្លែងកម្សាន្ត ដែលធ្វើឲ្យយុវវ័យជាទំពាំងស្នងឬស្សីខូចអនាគាតយ៉ាងច្រើន។
ដោយហេតុនេះ ទើបអភិបាលរាជធានីរូបនេះតាស់តឿនមន្រ្តីក្រោមបង្គាប់ពិសេសអភិបាលខណ្ឌទាំង ១៤ ឲ្យចាត់វិធានការតឹងរឹងបំផុត ក្នុងការធានាឲ្យបាននូវសន្តិសុខ សុវត្ថិភាពតាមភូមិ សង្កាត់ជូនពលរដ្ឋ ហើយក្នុងករណីកន្លែងកម្សាន្ត ក្លឹប ខារ៉ាអូខេ ណាមួយហ៊ានល្មើសច្បាប់ដោយបង្កឲ្យមានការចរាចរគ្រឿងញៀន នោះនឹងត្រូវបិទចោលនិងទទួលទោសតាមច្បាប់កំណត់។
ក្នុងនោះដែរ ឧត្ដមសេនីយ៍ឯក ស ថេត ស្នងការនគរបាលរាជធានីភ្នំពេញ បន្ថែមរឿងបង្ក្រាបគ្រឿងញៀនថា បច្ចុប្បន្នកម្លាំងរបស់លោកនៅតែបន្តចុះបង្ក្រាបគ្រឿងញៀនតាមក្លឹបតូចធំនានា ទោះកន្លែងនោះមានខ្នងធំប៉ុណ្ណាក៏ដោយ ដើម្បីកម្ចាត់ឲ្យអស់គ្រឿងញៀនតាមក្លឹបកម្សាន្ត ខារ៉ាអូខេទូទាំងប្រទេសនៅត្រឹមឆ្នាំ ២០១៩ ដែលស្របទៅនឹងវិធានការរបស់សម្តេច ស ខេង៕
ដោយ៖ រតនា
